ઘોડેસવાર:બાપુરાવ જગતાપ

પહાડમાંથી નીકળેલા ઘોડેસવાર

હમણા જ પહોંચી જશે આ ગામને પાદરે.

એ ગામે જેનાં કોઈ રૂપ નથી ,રંગ નથી ,

ફરકાવવા માટે જાતિ સિવાય કોઈ બીજી ધજા નથી.

મંદોને લાત મારીને

પથ્થર પર માથું અફાળીને બેસનારી આ જનતા,

ઊધઈ ખાધેલી જીર્ણ પોથીઓ

માથે મૂકીને શોખથી ફરનાર પુરોહિત

જય હો જય હો પોકારતા

અમાનવીય પરંપરા સાચવતા આવ્યા છે.

ઘોડેસવારનું આગમન થશે ત્યારે આ ગામો એમનો જયઘોષ કરશે

ઘેરઘેર રંગોળી પૂરી સ્વાગત કરશે.

જોશમાં આવી ગયેલા ઘોડેસવારને આ ખબર છે,

એ હવે ગામ જ બદલી દેવાના છે.

ગામની સીમાઓ તૂટવાની છે

ત્યારે હોઠોમાં નીલ પહાડ

ને પેટમાં લાલ વોલ્ગા લઈને

આ ગામ ઊભાં રહેશે.

ઘોડેસવાર હવે ગામમાં પહોંચી ચૂક્યા હશે.

અનુવાદસહાય : ડો.મોહિત શરદ શોલાપુરકર