અમે એમનાં વાલેશરી હતાં:અર્જુન ડાંગળે

ગળામાં કુલડી ગળે  

ને પૂંઠે ઝાંખરું.

જ્યારે અમે

‘માબાપ જોહાર,માબાપ’

કરતા સાદ પાડતા

ઉપલી શેરીઓમાં,

કાગડા અમારા શત્રુવત હતા

કારણ અમે અમારાં થૂંક-લીંટ પણ

ક્યારેય એમને આપતા નહીં.

ઉપલી શેરીનાં મરેલાં ઢોર

 ખેંચતાં,

ઊભાં ચીરતાં,

ચામડું કમાતાં,

ને ભોથાંના ભાગ પાડી લેતાં,

ત્યારે અમે એમનાં વાલેશરી હતાં.

અમે જંગ લડતા

શિયાળવાં-કૂતરાં-ગીધડાં,સમડી  સાથે

કેમકે અમે એમનું ભક્ષ્ય ખાઈ જતાં.

પરંતુ આજે દેખાય છે આમૂલાગ્ર પરિવર્તન

કાગડા-શિયાળવાં,કૂતરાં ,ગીધડાં, સમડીઓ

અમારાં પરમ મિત્ર થઇ ગયાં છે..

ઉપલી શેરીનાં  બારણાં

અમારાં શત્રુ થઇ ગયાં છે.  

‘ક્રાંતિ ઝીંદાબાદ!’

‘ઝીંદાબાદ!’

‘પરંપરા પર પ્રહાર કરનારને

જલાવી દો , જલાવી દો! ’

અનુવાદ સહાય

ડૉ.રચના પ્રદીપકુમાર પોળ 

અર્જુન ડાંગળે

જન્મ:૧૫ જૂન,૧૯૪૫

‘છાવણી હલતે આહે’ કાવ્યસંગ્રહ .દલિત પેન્થરના સ્થાપકોમાંના એક. ‘દલિત સાહિત્ય સંસદ’ સંસ્થા સાથે ઘનીષ્ટ સંકળાયેલા છે.સીમાસ્તંભસમા ’Poisoned Bread: Translations from Modern Marathi Dalit Literature’  નામના ઓરિયેન્ટ લોન્ગમેન દ્વારા પ્રકાશિત અંગ્રેજી અનુવાદસંચયના સંપાદક તરીકે જાણીતા છે. રાજકારણ, સમાજકારણ અને સાહિત્ય સાથે સતત સંકળાયેલા છે.